Dásamelga falleg mynd frá Möggu af Silkibóndarós 'Bowl of Beauty'.

Falleg mynd af Dornrós frá Möggu. Hvet alla sem eiga myndavél og garð til að fara út í garð, taka mynd(ir) og senda í gagnagrunninn okkar. Hann byggir sig ekki sjálfur. :)

Dornrósin ('Dornröschen') er ein af duglegustu eðalrósunum hér á landi. Hún er tilheyrir flokki nútímarunnarósa, en blómgerðin líkist terósarblendingi. Fái hún sæmilega gott skjól og sólríkan vaxtarstað er nokkuð öruggt að hún blómstri vel.

Það var úr vöndu að velja þessa vikuna, en þessi fallega mynd af skrautjarðarberi 'Pink Panda' frá Guðrúnu varð fyrir valinu. Það er ekki bara fallegt heldur þroskar líka gómsæt ber að hennar sögn.

Engjaíris (Iris setosa) er fínleg og harðgerð íristegund. Heimkynni hennar eru NV-hluti Kanada, Alaska og Síbería. Hún kann best við sig í frekar rökum jarðvegi og sól a.m.k. hluta úr degi.

Síberíubergsóley 'Markham's Pink' er falleg og dugmikil klifurplanta sem blómstrar í byrjun júní. Eins og á mörgum öðrum klifurplöntum á neðsti hluti plöntunnar það til að verða gisinn og ber með aldrinum. Það er því fallegast að planta öðrum plöntum fyrir framan hana. Það kemur t.d. mjög vel út að planta henni með klifurrósum. Rósin veitir henni stuðning til að klifra eftir, felur bera leggina og blómstrar eftir að bergsóleyjan hefur lokið blómgun sinni.

Bláfiðrildablóm (Nemesia versicolor) 'Blue Gem'. Himinblá blómin eru töluvert minni en á þessum venjulegu gulu og rauðu  fiðrildablómum (Nemesia strumosa), en þau eru þeim mun fleiri svo plantan verður þakin blómum. Virkilega flott tegund.

Hádegisblóm á sólríkum sumardegi.

Mynd dagsins í dag er valin úr innsendum myndum í plöntugagnagrunn Garðaflóru. Glæsileg mynd af freyjugrasi frá Möggu.

Höfuðlaukur (Allium aflatunense) byrjar að blómstra í byrjun júní og stendur í blóma fram í júlí. Hann er hávaxinn, um 80-90 cm á hæð. Glæsileg planta.