garðplöntur á Íslandi

Chaenomeles - Eldrunnar

 

Ættkvíslin Chaenomeles, eldrunnar, í rósaætt, Rosaceae, telur aðeins þrjár tegundir sem allar eiga heimkynni í A-Asíu. Þeir blómstra allir appelsínugulum eða rauðum blómum fyrir laufgun og eru þeir því mjög áberandi á vorin. 

​​​

• Chaenomeles japonica - dvergeldrunni, dvergroðarunni, litli eldrunni

• Chaenomeles x superba - eldþyrnirunni

  • 'Crimson and Gold'

Chiliotrichum - Körfurunnar 

 

Ættkvíslin Chiliotrichum , körfurunnar, er lítil ættkvísl fjögurra tegunda í körfublómaætt, Asteraceae, sem allar eiga heimkynni sunnarlega í S-Ameríku, í Argentínu og Chile. Þetta eru runnar með striklaga gráleitt lauf og hvít körfublóm.

​​​

• Chiliotrichum diffusum - körfurunni

  • 'Siska'

Cornus - Hyrnar

 

Ættkvíslin Cornus, hyrnar, er ættkvísl um 30-60 tegundir í skollabersætt, Cornaceae með útbreiðslu um nyrðra tempraða beltið. Þær tegundir sem vaxa hér bera lítil hvít blóm í klösum en suðlægari tegundir blómstra margar stórum hvítum blómum sem setja mikinn svip á umhverfið á vorin.

​​​

• Cornus alba - mjallarhyrnir

  • 'Elegantissima'

  • var. sibirica 

• Cornus sanguinea - dreyrahyrnir​

  • 'Winter Beauty'​

Cotoneaster - Misplar

 

Ættkvíslin Cotoneaster, misplar, er ættkvísl í rósaætt, Rosaceae með útbreiðslu um tempruðubelti Evrasíu. Tegundafjöldi er mjög breytilegur, frá um 70 til 300 eftir því hvernig tegundir eru skilgreindar. Mestur tegundafjöldi er í fjöllum SV-Kína og Himalajafjöllum. Flestar tegundir eru runnar, jarðlægar tegundir vaxa hátt til fjalla, hærri runnar nær sjávarmáli.

​​​​​

• Cotoneaster adpressus - skriðmispill

• Cotoneaster congestus - kúlumispill/slútmispill

• Cotoneaster integerrimus - grámispill

• Cotoneaster lucidus - gljámispill

• Cotoneaster x suecicus - breiðumispill

  • 'Skogholm'​

• Cotoneaster purpureus​​​ - purpuramispill

  • 'Variegatus'​

Crataegus - Þyrnar

 

Þyrnar, Crataegus, er stór ættkvísl í rósaætt, Rosaceae, með hátt í 200 tegundum með útbreiðslu um tempraðabelti Evrasíu og N-Ameríku, þar sem mestur tegundafjöldi er.​

Þetta eru tré eða runnar, oft þyrnóttir sem bera hvít eða bleik blóm í klösum og þroska ber sem eru mikilvæg fæða fyrir dýralíf á þeim svæðum sem þau vaxa villt.

​

• Crataegus douglasii - dögglingsþyrnir

• Crataegus laevigata - hvítþyrnir

  • 'Paul's Scarlet'​

• Crataegus sanguinea - síberíuþyrnir

Cytisus - Sópar

 

Sópar, Cytisus, er ættkvísl um 50 tegunda í ertublómaætt, Fabaceae. Heimkynni ættkvíslarinnar eru kjarrlendi í Evrópu, N-Afríku og vestanverðri Asíu. Þetta eru runnar með þéttar, grænar, uppréttar greinar, smátt lauf og blóm í gulum, rauðum eða rósrauðum litatónum sem þekja runnana á meðan á blómgun stendur.

​​​

• Cytisus nigricans (Lembotropis nigricans) - dökksópur

• Cytisus purgans - geislasópur

• Cytisus scoparius - gullsópur

  • 'Apricot Gem'

  • 'Lena'

  • 'Roter Favorit'

Daphne - Sprotar

 

Ættkvíslin Daphne, sprotar, tilheyrir týsblómaætt, Thymelaeaceae. Útbreiðslusvæði ættkvíslarinnar nær yfir hluta af Asíu, Evrópu og N-Afríku. Þetta eru lauffellandi eða sígrænir runnar, margir jarðlægir, sem blómstra margir síðvetrar eða snemma á vorin. Blómin eru smá, án krónublaða, grænleit, hvít eða bleik. Berin eru baneitruð.

​​​

• Daphne alpina - fjallasproti

• Daphne mezereum - töfrasproti, töfratré

  • f. alba

Forsythia - Vorgull

 

Forsythia, vorgull, er ættkvísl um 11 tegunda í smjörviðarætt, Oleaceae, sem allar eiga heimkynni í Asíu, utan ein sem vex í SA-Evrópu. Þetta eru gulblómstrandi runnar sem blómstra á vorin fyrir laufgun og setja mikinn svip á umhverfið á meðan á blómgun stendur.

​​​

• Forsythia ovata - vorgull

  • 'Tetragold'