FJÖLÆRAR PLÖNTUR

Fjölærar plöntur eru jurtkenndar plöntur sem visna niður að vetri en vaxa upp að nýju að vori. Margar geta staðið óhreyfðar árum saman, aðrar þurfa skiptingu á nokkurra ára fresti. Það má finna fjölæra plöntu sem passar við hvaða aðstæður sem er, hvort sem um er að ræða vegghleðslu eða skuggsælt horn. Sumar skarta miklu blómskrúði, aðrar eru helst ræktaðar vegna fagurra laufblaða.

D

Delphinium - Riddarasporar

Riddarasporar, Delphinium, er fjölskúðug ættkvísl í sóleyjaætt, Ranunculaceae, með um 300 tegundum. Flestar eru tignarlegir fjölæringar með heimkynni um norðanvert tempraða beltið og suður til fjalla Afríku. Mest er ræktað af kynbættum yrkjum í görðum.

Delphinium cashmerianum - lávarðaspori
Delphinium x cultorum - riddaraspori

Dianthus - Drottningablóm

Dianthus, drottningablóm, er stór ættkvísl í hjartagrasaætt, Caryophyllaceae, með um 300 tegundum sem flestar eiga heimkynni við Miðjarðarhafið, norður eftir Evrópu og austur til Asíu. Flestar mynda lága brúska eða breiður og vaxa best í þurrum, grýttum jarðvegi á sólríkum stað og henta því vel í steinhæðir.

Dicentra - Hjartablóm

Hjartablóm, Dicentra, er lítil ættkvísl í draumsóleyjaætt, Papaveraceae, (áður reykjurtaætt) með um 8 tegundum sem vaxa í N-Ameríku og A-Asíu. Þau hafa margskipt, þunn laufblöð og óreglugega löguð blóm sem minna oft á hjarta. Þau vaxa í sól eða hálfskugga í næringarríkri mold. Hjartablóm, Dicentra spectabilis, hefur nýlega verið flutt í sér ættkvísl, Lamprocapnos, en verður áfram haft hér undir sínu gamla heiti.