Skrautgrös

Silkibygg

Silkibygg er líklegast sú skrautgrastegund sem er algengust í ræktun hér, kannski að randagrasinu undanskildu. Þetta er sérstaklega falleg tegund, með silkihærðum, purpurableikum öxum. Það er því miður einært, en getur haldið sér við með sjálfsáningu við góð skilyrði. Ég sáði fyrir því fyrir mörgum árum og það hélt sér við í a.m.k. fimm ár. Það þarf frekar sólríkan stað og vel framræstan jarðveg, en gerir annars ekki miklar jarðvegskröfur. Það kann betur við sig í hæfilega rökum jarðvegi, en þolir þó nokkurn þurrk.

Það var ást við fyrstu sýn þegar ég sá mynd af þessari plöntu fyrst fyrir nokkrum árum. Ég hef haft augun opin fyrir fræi af því síðan, en ekki fundið, svo þegar ég rakst á þessa plöntu í Garðheimum í vor, þá var það aldrei spurning um að hún væri á leið með mér heim. Ég vona svo innilega að hún muni lifa. Ég tók þó smá anga af henni og geymi í gróðurhúsinu til vara. Eftir því sem ég kemst næst, þá þrífst hún best í hálfskugga, í lífefnaríkum, vel framræstum, rökum jarðvegi. Vonum það besta.

Fjallavingull

'Elijah Blue' er garðaafbrigði með grábláu laufi. Á plöntunni sem ég keypti var það skráð sem bjarnarvingull, Festuca scoparia, en flestar heimildir á netinu skrá það undir tegundarheitið, Festuca glauca, Fjallavingul. Ég keypti þessa plöntu á útsölu í haust, svo það á eftir að koma í ljós hvernig hún þrífst. 'Elijah Blue' þarf sólríkan stað og vel framræstan jarðveg eins og flestar aðrar tegundir þessarar ættkvíslar sem vaxa hér.

Blávingull

'Compact Blue' er garðaafbrigði af blávingli sem myndar þéttan, kúlulaga brúsk af þráðlaga, grábláu laufi. Hann lifði hjá mér í 2-3 ár, blómstraði einu sinni, en svo kom erfiður vetur sem varð honum um megn. Ég man ekki alveg hvort það var veturinn 2017-2018 eða 2018-2019, en það var fleira sem tapaðist þá en þessi planta. Blávingull kann hvorki við skugga né bleytu, hann vex í sendnum, vel framræstum jarðvegi á berangri þar sem ekkert skyggir á hann. Algengur um allt land. Þetta garðaafbrigði þarf sömu skilyrði til að þrífast vel.