Garðablágresi, ýmsir litir

Geranium pratense

Garðablágresi er hávaxin fjölær planta sem þarf stuðning. Það er töluvert hávaxnara og með stærri blóm en íslenska blágresið.
Sjálfsánar plöntur í ýmsum bleikum, ljósfjólubláum og bláfjólubláum litatónum.
Harðgert.

Það getur verið fallegt að blanda nokkrum litum saman.

Dreyramura 'Monarch's Velvet'

Potentilla thurberi

Meðalhá fjölær planta með dökkrauðum blómum með enn dekkri miðju. Getur þurft stuðning því blómstönglarnir vilja leggjast út af. Harðgerð. Þarf sólríkan stað í frekar vel framræstum jarðvegi.

Gullhnoðri

Sedum aizoon

Harðgerður, meðalhár, hnoðri sem blómstrar gulum blómum í júlí - ágúst. Þolir skugga part úr degi.

Balkankyndill 'Wedding Candles'

Verbascum chaixii

Afbrigði af balkankyndli með kremhvítum blómum. Balkankyndill er skammær fjölæringur sem þrífst best á sólríkum stað í frekar rýrum, vel framræstum jarðvegi. Verður hávaxinn og þarf stuðning, sérstaklega ef hann vex í frjóum jarðvegi.

Snepla, óþekkt yrki

Hebe

Sígrænn, lágvaxinn runni með grágrænu laufi. Blómstrar hvítum blómum sem líkjast deplublómum (Veronica). Smáplanta keypt að hausti sem var ekki merkt yrkisheiti. Líkist mjög H. topiaria.
Hefur lifað í mörg ár áfallalaust og tók upp á því að blómstra fyrir nokkrum árum.
Hefur sáð sér aðeins, þegar fræ nær að þroskast. Um er að ræða sjálfsánar plöntur.

Aronsstigi 'Apricot Delight'

Polemonium carneum

Yndislega falleg tegund með gul-bleikum blómum. Meðalhá og myndar breiðan brúsk sem getur þurft stuðning. Þolir skugga part úr degi. Harðgerður.

Bjarmabergsóley

Clematis tangutica

Bjarmabergsóley er nokkuð harðgerð klifurjurt sem blómstrar gulum blómum frá júlí og fram á haust. Þarf sólríkan stað og frjóan, vel framræstan jarðveg.

Friggjarlykill, blandaðir litir

Primula florindae

Nokkrar sjálfsánar plöntur af friggjarlykli, flestar gular eða rauðar. Harðgerð fjölær planta sem þrífst best í frekar rökum jarðvegi. Þolir illa þurrk. Getur vaxið í sól eða hálfskugga.

Vatnsberi 'Red Hobbit'

Aquilegia x hybrida

Lágvaxinn vatnsberi með fíngerðu laufi og stórum, rauðum og hvítum blómum.

Haustsnotra

Anemone huphensis

Hávaxin, fjölær planta sem blómstrar hvítum blómum með fölbleikri slikju í ágúst.
Harðgerð og blómgun örugg.

Tjarnaríris

Iris pseudacorum

Hávaxin, gróskumikil og harðgerð íristegund sem blómstrar gulum blómum um mitt sumar. Þrífst best í blautum, jafnvel vatnssósa jarðvegi en þolir vel að vaxa í venjulegri garðmold ef hún er rakaheldin.

Moskusrós 'Appleblossom'

Malva moschata

Moskusrós er harðgerður fjölæringur sem blómstrar í ágúst. 'Appleblossom' er afbrigði með fölbleikum blómum. Hún þarf sól a.m.k. part úr degi og frjóan, vel framræstan jarðveg. Blómstönglarnir hafa tilhneigingu til að leggjast út af, svo hún þarf stuðning.