Mar 28, 2018

Lamium maculatum 'Eva' - Dílatvítönn

0 comments

 

'Eva' er sjálfsáður blendingur af dílatvítönn og yrkinu 'Beacon Silver'. Ég fékk tvo slíka blendinga þar sem lauflitur og blómlitur höfðu víxlast og fannst mér báðir þess virði að nefna þá. Ég ákvað að nota millinöfn dætra minna og leyfði þeim að velja hvor héti hvað. 'Eva' hefur laufið frá 'Beacon Silver', en þó er græna bryddingin dekkri og breiðari á 'Evu'. Blómliturinn er purpurarauður eins og á tegundinni. Hún er gróskumeiri en báðir foreldrarnir, bæði að umfangi og hæð, svo það þarf að ætla henni sæmilegt rými. Hún myndar frekar brúsk en breiðu svo hún nýtist ekki sem þekjuplanta. Mér finnst hún alveg afburðarfögur. Það getur stundum borgað sig að vera ekki of duglegur að hreinsa beðin.

 

New Posts
  • Mjög fallegt afbrigði af garðavatnsbera með gulum blómum með löngum útsveigðum sporum. Hann hefur reynst mjög blómsæll og stendur lengi í blóma. Því miður hef ég ekkert yrkisnafn. Planta frá Möggu.
  • Þetta er sjálfsáður blendingur sem birtist í garðinum mínum, sem er greinilega afkomandi skógarvatnsbera afbrigðisins 'Magpie'. Blómliturinn er sá sami, en blómin eru stærri, jafn stór og á garðavatnsberum, svo hitt foreldrið er líklega af þeim meiði. Sporarnir eru innsveigðir eins og á skógarvatnsbera. Mér finnst þessi fallegri en frumgerðin og hann er jafn harðgerður og aðrir vatnsberar.
  • 'Crimson Star' er fallegt garðaafbrigði með rauðum og kremhvítum blómum, með löngum sporum. Ég keypti þennan í pakka frá Costco 2018 og hann blómstraði í fyrsta sinn núna í sumar. Vatnsberar eru nokkuð skuggþolnir, en þeir þrífast og blómstra betur í sól eða hálfskugga. Einu jarðvegskröfurnar eru að jarðvegurinn sé vel framræstur, en betra er að hann sé frekar frjór líka. Mér fannst vissara að bjóða svona fínni sort upp á bestu skilyrði svo hann lifi nú sem lengst.

gardaflora@gardaflora.is    I     © 2015-2019  Garðaflóra.

  • Facebook App Icon