Tré og runnar skiptast í tvær megin plöntufylkingar, befrævinga og dulfrævinga. Berfrævingar þroska fræ sem eru óvarin í könglum, en dulfrævingar bera blóm og þroska fræ hulin aldinum. Dæmi um berfrævinga eru barrtré eins og greni og fura.
Lauftré s.s. birki og reynir eru dulfrævingar. Hér verður þeim skipt í þrjá flokka, lauftré með óverulegum blómum s.s. reklum, blómstrandi lauftré og runna og blómstrandi sígræna runna.
Barrtré þola mörg hver meiri þurrk og kulda en lauftré því laufblöðin, barrið, hafa lítið yfirborðsflatarmál og í sumum tilvikum eru þau vaxborin, til að koma í veg fyrir vökvatap. Þau eru í flestum tilvikum sígræn, þ.e. fella ekki barrið á veturna. Barrskógarbeltið tekur við af laufskógarbeltinu á norðurhveli og teygir sig langt norður að freðmýrum norðurheimskautsins.
