Fræblanda frá Lord Nelson, sem mér var gefin fyrir nokkrum árum og ég hef sáð úr a.m.k. tvisvar. Ég hef ekki fengið tvær eins plöntur, allar hafa verið í mismunandi bleikum eða hvítum litatónum, ýmist með fylltum eða einföldum blómum. Stúdentadrottningar verða því miður ekki langlífar, svo það þarf að sá til þeirra með nokkurra ára millibili. Þær vilja leggjast svolítið útaf, svo það er ágætt að ætla þeim sæmilegt pláss. Þær þurfa frekar sólríkan stað og vel framræstan, frjóan jarðveg.

Sandheiður er jarðlæg steinhæðaplanta ættuð frá Himalajafjöllum. Laufið er smágert og minnir nokkuð á blóðberg, en blómin eru blá og hlutfallslega stór miðað við laufið. Ég keypti þessa plöntu 2018 og hún hefur vaxið hægt en örugglega og er orðin sæmilega þétt breiða næst miðju. Virðist þrífast ágætlega ef frárennsli er nægilegt.

Gulllotkarfa, eða bara lotkarfa, er ættuð frá Himalajafjöllum eins og aðrar tegundir þessarar ættkvíslar. Svölu sumrin hér á landi henta þeim vel, en þær þurfa mjög vel framræstan jarðveg því blautir vetur eiga ekki alveg eins vel við þær. Plantan mín hefur þó þrifist ágætlega hingað til. Hún vex í gæða garðmold blandaðri með fínum vikri á stað þar sem hún fær sól yfir hádaginn. Hún blómstraði í fyrsta sinn sumarið 2019, um miðjan júní, og var stórkostlega flott í blóma. Ég fékk þessa plöntu frá Guðrúnu og við vorum í nokkrum vafa um hvort þessi planta væri lotkarfa eða hélulotkarfa. Eftir mikið gúggl hallast ég að því að þetta sé frekar lotkarfa út frá laufblöðunum. Samkvæmt upplýsingum á FB síðu grasagarðsins í Tromsö er þetta nokkuð breytileg tegund sem getur myndað blendinga við tegundir í ættkvísl skjaldblóma, Ligularia .