Nov 4, 2018

Ranunculus repens 'Pleniflorus' - Skriðsóley

0 comments

 

'Pleniflorus' er garðaafbrigði af skriðsóley með fylltum, gulum blómum sem eru grænleit í miðjunni. Ég hef ekki reynslu af þessari plöntu sjálf, myndin er tekin í garði Kristleifs heitins Guðbjörnssonar. Mér skildist á honum að hún væri nokkuð stillt hjá honum, en hún getur breitt úr sér, sérstaklega ef jarðvegurinn er leirkenndur og rakur. Það er hennar kjörlendi. Það sama á við um tegundina, en nýi garðurinn minn býður einmitt upp á þessar kjöraðstæður. Ég hef aldrei séð eins gróskumikið stóð af skriðsóley og er í þessum garði, plönturnar ná mér í hné þegar komið er fram á sumar. Miðað við hvað tegundin er magnað illgresi þá kemur kannski á óvart að til er töluverður fjöldi af garðayrkjum sem ræktuð eru erlendis. 'Pleniflorus' er eina yrkið sem ég hef rekist á hér.

New Posts
  • Mjög fallegt afbrigði af garðavatnsbera með gulum blómum með löngum útsveigðum sporum. Hann hefur reynst mjög blómsæll og stendur lengi í blóma. Því miður hef ég ekkert yrkisnafn. Planta frá Möggu.
  • Þetta er sjálfsáður blendingur sem birtist í garðinum mínum, sem er greinilega afkomandi skógarvatnsbera afbrigðisins 'Magpie'. Blómliturinn er sá sami, en blómin eru stærri, jafn stór og á garðavatnsberum, svo hitt foreldrið er líklega af þeim meiði. Sporarnir eru innsveigðir eins og á skógarvatnsbera. Mér finnst þessi fallegri en frumgerðin og hann er jafn harðgerður og aðrir vatnsberar.
  • 'Crimson Star ' er fallegt garðaafbrigði með rauðum og kremhvítum blómum, með löngum sporum. Ég keypti þennan í pakka frá Costco 2018 og hann blómstraði í fyrsta sinn núna í sumar. Vatnsberar eru nokkuð skuggþolnir, en þeir þrífast og blómstra betur í sól eða hálfskugga. Einu jarðvegskröfurnar eru að jarðvegurinn sé vel framræstur, en betra er að hann sé frekar frjór líka. Mér fannst vissara að bjóða svona fínni sort upp á bestu skilyrði svo hann lifi nú sem lengst.

gardaflora@gardaflora.is    I     © 2015-2019  Garðaflóra.

  • Facebook App Icon