Skuggasteinbrjótur er líka þekktur undir nafninu postulínsblóm. Hann er mjög harðgerður og skuggþolinn og getur með tímanum myndað stórar breiður af spaðalaga laufblöðum. Blómin eru smá, fölbleik í gisnum margblóma klösum. Þetta er blendingur S. umbrosa og spaðasteinbrjóts, S. spathularis.
Ég er vön að kalla hann postulínsblóm. Hann er dugleg planta en mér finnst hann hafa breitt of mikið úr sér þar sem ég hef verið með hann, jafnvel að mér finnist vera hægt að segja að hann sé ágengur. Líklega er hann skikkanlegri í rýrari jarðvegi og reyndar er þetta falleg planta með glansandi laúf í rósettulaga hvirfingu,
Já, hann er þekktur fyrir að breiða fullmikið úr sér. Af einhverjum ástæðum hefur hann ekki gert það hjá mér, mér hefur fundist hann fara sér heldur hægt. Mig langar til að nýta hann sem þekjuplöntu á lóðarmörkunum þar sem skriðsóleyin ræður nú ríkjum, en held að hann myndi nú seint ná að þekja það svæði einn. Gulltvítönnin er mjög öflug - held þau gætu alveg verið flott saman og kannski einhverjar fleiri skuggþolnar þekjuplöntur.