Jan 20

Bjarmarós 'Celestial'

1 comment

 

'Celestial' er í mestu uppáhaldi hjá mér af þeim bjarmarósum (R. alba) sem ég hef prófað. Blómin eru hálffyllt og mikið ilmandi, ljósbleik. Ég átti hana í gamla garðinum, en hún lifði flutninginn ekki af. Hún óx í rósabeði sunnan við húsið og þreifst ágætlega þar. Hún er ekki eins harðgerð og 'Maiden's Blush' og 'Maxima', sem báðar þola skugga part úr degi (svo framarlega sem hann sé ekki of mikill) og lifðu báðar af hremmingar flutningsins. Ég gróðursetti þær og aðrar antíkrósir í beðið meðfram veggnum hjá pallinum. Hann snýr í SV og ég taldi að það myndi duga þeim. En skugginn þar var of mikill svo þær eru komnar á nýjan stað og ná sér vonandi aftur á strik. 'Celestial' þarf góða sól og gott skjól, svo ég veit ekki hvort ég get búið henni nógu góðan stað í nýja garðinum.

 

 

 

New Posts
  • Hvað segið þið um rósapöntunarlistann - ætlar einhver að panta? Ég er í miklum vanda stödd - það eru svo margar rósir sem mig langar að prófa. Ég er alveg ákveðin að panta: 'Peter Boyd' 'Prairie Magic' Svo er vandinn að velja á milli þessara: 'Absolutely Fabulous' (Julia Child) - mér finnst nafnið á þessari svolítið heillandi, fyrir utan hvað hún er falleg. Zone 5b 'Blanche de Belgique' - fannst þessi áhugaverð því hún er sögð zone 3b, en svo fletti ég upp 'Maiden's Blush' og 'Alba Maxima' og þær eru það líka. Svo ég er ekki viss með hana, svo margt annað sem mig langar í. 'Kordes Robusta' - þessi á að vera zone 4b, mér finnst hún svolítið heillandi, en hrædd um að hún þyrfti að vera sunnan megin þar sem plássið er takmarkað. Svo á ég 'Champlain' (vonandi) og hún er zone 4a. 'Mon Amie Claire' - síblómstrandi þyrnirósarblendingur. Hún er sögð zone 4 (-34°C), blómin eiga að vera regnþolin og mikið ilmandi. Þetta hljómar allt saman afskaplega vel. ' Sachalin ' - ígulrósarblendingur, blómin eru heillandi formfögur og falleg á litinn. En hún er sögð zone 6 (-24°C), sem vekur efasemdir um að hún gæti gert eitthvað á norðurhliðinni. Hún þarf líklegast gott skjól. ' Brenda Colvin ' - klifurrós(flækjurós), spurning hvað hún getur gert hér. Reynsla Vilhjálms er athyglisverð og vekur löngun til að prófa. Hún er zone 6 (-24°C). Svo hún er líklegast að keppa um pláss sunnan megin. ('Maigold' er sögð zone 5-6 eftir heimildum, hún hefur reynst vel hjá mér, en þarf að vera við suðurvegginn). Hún lifði í geymslubeðinu hinu megin, en blómstraði ekki. 'Paul's Scarlet Climber' - klifurrós (flækjurós), sögð zone 6b. 'Flammentanz' er zone 5 og þarf suðurvegginn, svo það sama gildir örugglega um þessa. Líklegt að hún verði settleg beðrós hér. ' Graham Thomas ' - ég er að spá hvort ég eigi að gefa Austin rósunum annan séns. Hef verið mjög óheppin með þær sem ég hef prófað. Þessi er zone 5b eins og 'Absolutely Fabulous' og gul eins og hún. 'Jude the Obscure' - önnur Austin rós, þessi er meira út í ferskjubleikt. Líka zone 5b. 'Kew Gardens' - Austin rós og moskusrósarblendingur. Zone 5. Mér finnst eitthvað heillandi við þessa rós. 'Princess Alexandra of Kent ' - Austin rós sem á að vera zone 4. Á að ilma mikið og blómliturinn er æðislegur. Minnir mig á 'Aloha' sem ég átti í gamla garðinum og átti mjög erfitt uppdráttar. ' Sceptre'd Isle' - Austin rós sem á líka að vera zone 4. Og sögð þola kulda og regn. Það er kostur. 'Olds College' - Kanadísk rós sem á að vera zone 3. Mjög freistandi. Semsagt mikill valkvíði í gangi hér.
  • Pólstjarnan er mjög stórvaxin klifurrós sem getur náð nokkurra metra hæð. Hún er nokkuð harðgerð, en þarf þó skjól fyrir norðanáttinni. Blómin eru lítil, hálffyllt, allmörg saman í klasa. Hún er ein af fáum klifurrósum sem eru nógu harðgerðar til að vaxa á rósaboga.
  • ' Buff Beauty ' er moskusrósarblendingur sem er nokkuð frábrugðinn öðrum rósum í þeim flokki, sem ég hef prófað. Þær hafa allar lítil blóm í margblóma klösum, einföld eða fyllt, en blómin á 'Buff Beauty' eru töluvert stærri. Þau eru óskaplega falleg á litinn, knúpparnir eru dökk ferskjubleikir og blómin lýsast eftir því sem þau eldast og verða að lokum rjómahvít. Hún er viðkvæm og þarf mjög góðan stað til að ná að blómstra og vetrarskýli. Hún blómstraði mjög vel sumarið 2008, sem var með eindæmum hlýtt og sólríkt, hér á suðvestur horninu a.m.k. og sýndi þá hversu stórkostlega falleg hún er. Hún drapst á fyrsta vetri eftir flutning.

gardaflora@gardaflora.is    I     © 2015-2019  Garðaflóra.

  • Facebook App Icon