'Marie-Victorin' er Kordesii blendingur í kanadísku Explorer-seríunni, eins og rósin 'Champlain'. Blómin eru fallega bleik, með laxableikum knúppum. Ég man ekki hversu ilmsterk hún er, en minnir að það hafi verið einhver ilmur. Ég keypti plöntuna í gegnum rósaklúbb GÍ vorið 2017. Hún blómstraði mjög seint það ár, í september, svo hún náði ekki alveg að sýna hvað í henni býr. En það sem hún stal senunni í fyrrasumar. Þar sem hún er í rósabeðinu með dekurrósunum, þá nýtur hún góðs af vetrarskjólinu undir akrýldúknum, svo ég veit ekki hvernig hún stæði sig án vetrarskýlis. Hún á að vera nokkuð harðgerð skv. erlendum harðgerðiskvörðum, USDA zone 3 og H6 á skandínavíska skalanum.
Ég ákvað að prófa hvernig rósin myndi standa sig fjær skjólinu við vegginn og sú tilraun endaði með því að hún er aftur komin í rósabeðið við vegginn. Hún náði sér ekki á strik á hinum staðnum, líklega fékk hún ekki næga sól. Hún blómstraði lítillega í sumar (2021), en hún þarf sennilega einhvern tíma til að jafna sig áður en hún nær fyrri dýrð.
Glæsileg mynd Guðrún ⭐️⭐️⭐️