Fjölærar plöntur

Það er kannski komið nóg af mismunandi tilbrigðum af dílatvítönn, en mínar eru enn iðnar við kolann og ég fann þessa í vor. Laufið er áberandi límónu-myntugrænt, ekki eins hvítsilfrað og 'Eva', 'Beacon Silver' og 'Silfra'. Ég ákvað að ganga út frá lauflitnum við nafngiftina og nefni hana 'Mojito'. Blómin eru einhverskonar millistig milli bleiks og purpurarauðs, einhverskonar fjólubleikur, svolítið eins og bláberjarjómi. Svo er bara að bíða og sjá hvort hún heldur þessum sérstaka lauflit næsta sumar. Ég reikna fastlega með að hún verði harðgerð eins og systurnar.