Ég rakst á þessa plöntu í garðyrkjustöð í fyrra sumar og ákvað að kaupa hana án þess að vita neitt um hana. Ég varð ekki fyrir vonbrigðum. Hún þrífst ljómandi vel, er með falllegt lauf og blómstrar mjög sérkennandi, fíngerðum puntum sem standa fram á vetur. Kjöraðstæður eru sól eða hálfskuggi í vel framræstum, rökum jarðvegi.
Skrautpuntur
'Aureum' er afbrigði af skrautpunti með gulgrænu laufi. Þetta er mjög blaðfögur planta og að auki eru puntstráin mjög formfögur, svo það mætti segja að hún hafi allan pakkan. Ég ræktaði þessa plöntu af fræi fyrir mörgum árum. Hún fór hægt af stað og virtist í fyrstu ekki ætla að ná mikilli grósku, en tók svo hressilega við sér og hefur vaxið vel og blómstrað árlega. Hún vex í sól eða hálfskugga, í vel framræstum, rökum jarðvegi.
'Solar Flare' er lágvaxið afbrigði af lundahæru með gulgrænu laufi. Það blómstrar brúnum blómum snemmsumars. Ég ræktaði það af fræi og plantaði fyrstu plöntunni út í beð haustið 2019. Sú planta kom mjög vel undan vetri og óx vel í sumar. Lundahæra þolir vel að vaxa í skugga part úr degi og vex best í rökum, vel framræstum jarðvegi.
Blástrýgresi er smávaxið, fíngert skrautgras með blágrænu laufi. Blómin eru í þéttum punti, kremhvít og stráin verða gulbrún þegar þau þroskast. Ég ræktaði það af fræi fyrir nokkrum árum og það virðist vera ágætlega harðgert. Það blómstraði í fyrsta sinn í sumar mér til mikillar gleði og hlakkaði ég til að njóta þeirra fram eftir vetri. Ég var að brasa í beðinu í haust og færa til plöntur og tókst að brjóta öll stráin, svo þar fór það þetta árið. En ég er allavega afskaplega lukkuleg með það. Á myndinni sjást tvær minni plöntur sem höfðu verið í pottum í tvö ár sem ég plantaði út í beð núna í haust, svo ég á von á myndarlegum brúski næsta sumar! Það vex best í sól í vel framræstum jarðvegi.
Myndir og upplýsingar um reynslu af ræktun skrautgrasa
