Sverðuxatunga er sígræn burknategund sem vex villt í vestanverðri N-Ameríku. Hann vex best í skugga eða hálfskugga, í frjóum, lífefnaríkum jarðvegi í góðu skjóli. Ég ræktaði mínar plöntur af gróum og plantaði einni út í beð í vor. Hún hefur vaxið vel og vonandi mun hún koma vel undan vetri.
Skrápuxatunga er mjög falleg burknategund með stinnu, gljáandi grænu laufi sem á að vera sígrænt. Ég keypti þessa plöntu í vor svo það á eftir að koma í ljós hvort og þá hvernig hún þrífst. Hún þarf gott skjól í skugga eða hálfskugga, í vel framræstum, lífefnaríkum, rökum jarðvegi.
Roðadálkur er mjög fallegur burkni með gljáandi laufi sem er bronslitað í fyrstu, en verður svo grænt. Ég keypti hann í vor, svo það á eftir að koma í ljós hvort hann getur þrifist hérna. Þetta er tegund sem á heimkynni í Kína og Japan og er vinsæl garðplanta. Hann þarf sömu skilyrði og aðrir burknar, vel framræstan, lífefnaríkan, rakan jarðveg í skugga eða hálfskugga.
'Lady in Red' er meðalhátt garðaafbrigði af fjöllaufunig með rauðleitum blaðstilkum. Það er heldur lægra en tegundin en er að öðru leiti svipað og vex við sömu skilyrði. Ég bind vonir við að það eigi eftir að þrífast jafn vel, það óx allavega vel í sumar.
Myndir og upplýsingar um reynslu af ræktun burkna
